Bernoulli, Johann I an Wolff, Christian (1733.01.19)
|
|
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Wolff, Christian, 1679-1754 |
| Ort | Basel |
| Datum | 1733.01.19 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 671, Nr.37 |
| Fussnote | |
Viro amplissimo ac celeberrimo
Christiano Wolfio
S. P. D.
Joh. Bernoulli
Litterae Tuae novissimae,[1] quas ante aliquot dies per manum Celeb. nostri Hermanni accepi,[2] miram in me spirant humanitatem atque constantis Amicitiae tuae affectum, de quo mihi gratulor eoque nomine maximas [a]go[3] gratias. Votum quod pro salute mea fundis, id Tibi reddo ex toto animo, precorque Numen divinum ut Te Virum reip. litterariae utilissimum, non hoc tantum anno quem nuper feliciter auspicati sumus, sed per longam sequentium annorum seriem conservet incolumem et omni bonorum genere affluentem, quod quidem non ego tantum, sed quicunque mecum amant scientias, ardentissimis precibus a Deo efflagitare debent. Accepi utique Psychologiam[4] Tuam,[5] opus egregium, una cum quibusdam Trimestribus horarum subsecivarum[6], pro quo munere me denuo devinctissimum agnosco, cuperem certe par pari referre si quid curta mea supellex suppeditaret, sed ea qua sum aetate vix quicquam amplius a me expectari potest. Nobilis Vir juvenis de Blome[7] magna certe me affecit laetitia, cum me inviseret et tuo nomine salutem mihi afferret, miratus sum ejus amabilem Indolem atque cultissimos Mores, propter quos, atque imprimis etiam ob amorem in te meum, ei aliquot Civilitatis signa lubentissime exhibuissem, sed eodem quo me inviserat die hinc iterum profectus nullam mihi reliquit occasionem sibi testandi benevolum meum animum. Qui has ad Te defert litteras, modo per urbem vestram sit transiturus, secus Tibi mittet Francofurto, Vir juvenis est pariter egregius nomine Moula, origine ex Urbe Neocomi, per aliquot annos meus Discipulus[8] insignes fecit progressus in Mathematicis, nec non in aliis Disciplinis atque Artibus, praesertim in Musicis et Exercitiis gÿmnasticis haud mediocriter versatus. Tendit Berolinum invitatus a Domina de Camecke, [9]Ministri Status hujus nominis Vidua,[10] ad obeundum Filii sui Ephoratum vel informatoris munus; Si quos adhuc habes Berolini Amicos et Fautores, optime de me mereri poteris, si eum volueris de meliori nota commendare; quo ipso feceris rem non solum mihi gratissimam, sed propensione Tua qua Studiorum nostrorum Amatores prosequi soles dignissimam atque ab ipso Nostro nulla unquam oblivione obliterandam.
Vale, Vir Ampliss. et fave.
Dabam Basil. a. d. 19. Jan. 1733.
Fussnoten
- ↑ Brief von Christian Wolff an Johann Bernoulli von 1733.01.07.
- ↑ Der Brief Wolffs an Johann Bernoulli lag offenbar einem Brief Wolffs an Jacob Hermann bei.
- ↑ Im Manuskript steht "ego"
- ↑ Im Manuskript steht "Psylochogiam"
- ↑ Wolff, Christian, Psychologia empirica methodo scientifica pertractata, qua ea, quae de anima humana indubia experientiae fide constant, continentur et ad solidam universae philosophiae practicae ac theologiae naturalis tractationem via sternitur, Francofurti et Lipsiae (Renger) 1732.
- ↑ Siehe die Aufzählung in der entsprechenden Anmerkung zum Brief von Johann Bernoulli von 1731.10.16.
- ↑ Bsher nicht identifiziert.
- ↑ Frédéric Moula (1703-1782) hatte sich am 22.10.1727 in Basel immatrikuliert (Matrikel Basel IV, Nr. 17) und studierte hauptsächlich bei Johann Bernoulli Mathematik.
- ↑ Von hier an andere Schreiberhand als auf der vorigen Seite
- ↑ Es handelt sich vielleicht um Magdalena von Kameke geb. von Barfuß (1688–1756), Witwe des preussischen Staatsministers Ernst Bogislav von Kameke (1674-1726). Das Paar hatte einen Sohn und sechs Töchter.
Zurück zur gesamten Korrespondenz