Wolff, Christian an Bernoulli, Johann I (1728.04.04)
|
|
|
|
| Kurzinformationen zum Brief mehr ... | |
|---|---|
| Autor | Wolff, Christian, 1679-1754 |
| Empfänger | Bernoulli, Johann I, 1667-1748 |
| Ort | Marburg |
| Datum | 1728.04.04 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 671, Nr.43* |
| Fussnote | Letzte Seite leer |
Viro Amplissimo atque Celeberrimo
Joanni Bernoulli
S. P. D.
Christianus Wolfius.
Ad litteras Tuas, Vir Celeberrime, anno superiori ad me datas[1] tardius respondeo, quoniam hactenus impeditus fui, ne desiderio Tuo satisfacere potuerim in recensenda Dissertatione Tua de legibus motus.[2] Etsi enim obiter eam perlegerim, haud quaquam tamen singula satis expendere licuit, propterea quod totus per hanc hiemem fuerim in edendo Tomo primo Operum philosophicorum,[3] qui discursum praeliminarem et Logicam complexus quinquies fere alpha[be]tum adimplet ac ne nunc quidem typis integer descriptus prostat, ut Tibi exemplar mittere liceret. Quoniam tamen hunc laborem feliciter, nec, ut spero, inutiliter superavi, mihi tandem redditus ad lectionem Dissertationis Tuae a[c]cedo et totus in ea ero, donec integram ad trutinam appenderim, atque in compendium miserim Actis Eruditorum proxime inserendum,[4] quibus etiam postea inserendae erunt recensiones illarum quae praemio condecoratae fuerunt.[5] In Transactionibus Anglicanis, quas his diebus accepi, vidi impugnari demonstrationem Tuam de viribus vivis;[6] quam elementis meis Matheseos inserui,[7] etsi suppresso nomine Tuo. Non miror, Gallos Tibi praemium non decrevisse, cum ratio status minime permisisset, etiamsi ad rationes Tuas nihil reponere potuissent. Puto tamen ipsos non malitiose Tecum egisse; sed revera adhuc persuasos esse, penes se stare veritatem, cum in principiis utique Angli et Galli a nobis dissentiant aliam prorsus notionem virium sibi formantes quam Leibnitius, cum qua mensura Leibnitiana minime consistit. Sed de his proxime scribam apertius, ubi dissertationem Tuam curate perlegero: videntur enim mihi adhuc superesse dubia quaedam quae obstant, quo minus Angli et Galli consentire queant. Transactionibus Anglicanis multa hactenus a variis contra vires vivas prolata sunt et inprimis calamus stringitur adversus Cl. Polenum, cui describi curavi, quae ad ipsum spectant.[8] Videbimus, quid ad ea sit repositurus.
Ego controversiam prorsus missam feci;[9] philosophiae tamen potius excolendae, quam Mathesi incumbo, propterea quod huic plures utiliter vacent, quam isti, utut illa non minorem generi humano, immo majorem spondeat utilitatem quam Mathesis. Puto ubi primum operum Latinorum volumen, quod, quamprimum sese obtulerit occasio, Tibi mittam, videris, Tibi institutum meum probatum iri. Etenim Mathematicorum more ad notiones fixas et determinatas reduco, quae confusis implicantur et vagis ancipitia redduntur. Et spero fore aliquando, si hac via philosophari pergant alii, ut non minus certo tramite ad nova continuo progredi detur in philosophia, quam nunc in Mathesi licet. Immo confido, me et Mathematicis novos campos aperturum, in quos utiliter exspatiaturi sunt, et Mathematum utilitatem aliis quoque persuasurum, qui exiguum eidem pretium statuunt, si a practica Mathesi discesseris. Vale et fave.
Dabam Marburgi. d. 4 April. 1728.
Fussnoten
- ↑ Brief Johann Bernoullis an Wolff von 1727.08.26.
- ↑ Bernoulli, Johann I Op. CXXXV, Discours sur les loix de la communication du mouvement ....
- ↑ Wolff, Christian, Philosophia rationalis sive logica, methodo scientifica pertractata et ad usum scientiarum atque vitae aptata. Praemittitur discursus praeliminaris de philosophia in genere, Francofurti et Lipsiae (Renger) 1728.
- ↑ [Wolff, Christian], Rezension von Discours sur les lois de la communication du mouvement etc. &c. hoc est, Discursus de legibus communicationis motus, qui elogia Academiae Regiae Scientiarum A. 1724 & 1726 meruit & exhibitus fuit occasione praemorum istis annis distributorum, in: AE Novembris 1728, pp. 504-516.
- ↑ [Wolff, Christian], Rezension von Piece, qui a remporté le prix de l'Academie Royale des Sciences pour l'Année mil sept cens vingt-quatre, hoc est, Dissertatio, quae praemio condecorata fuit ab Academia Regia Scientiarum A. 1724, ex legato Rouillé de Messay, Consiliarii quondam in suprema curia Parisiensi[ = Mac Laurin, Colin, Démonstration des loix du choc des corps], in: AE Novembris 1728, pp. 516-518.
- ↑ Eames, John, A Remark upon the New Opinion relating to the Forces of moving Bodies, in the case of the Collision of Non-Elastic Bodies. By Mr. John Eames, F. R. S., in. Phil. Trans. Nr. 396 (1728), pp. 183-187. und Eames, John, Remarks upon a supposed Demonstration, that the moving Forces of the same Body are not as the Velocities, but as the Squares of the Velocities. By the same, in: Phil. Trans. Nr. 396 (1728) und pp. 188-191.
- ↑ Wolff, Christian, Elementa matheseos universae. Tomus I, qui commentationem de methodo mathematica, arithmeticam, geometriam, trigonometriam, analysin tam finitorum, quam infinitorum, staticam et mechanicam, hydrostaticam, aerometriam, hydraulicam complectitur, Halae Magdeburgicae (J. G. Renger) 1713, pp. 594-595.
- ↑ Diese Abschriften Wolffs von gegen Poleni gerichteten Aufsätzen aus den Phil Trans. sind bisher nicht identifiziert. Es könnte sich z.B. handeln um: Pemberton, Henry, A Letter to Dr. Mead, Coll. Med. Lond. et Soc. Reg. S. concerning an Experiment, whereby it has been attempted to shew the falsity of the common Opinion, in relation to the force of Bodies in Motion, in: Phil. Trans. Nr. 371, April and May 1722, pp. 57-68; Desarguiliers, Theophilus, An Account of some Experiments made to prove, that the Force of Moving Bodies is proportionable to their Velocities: (or rather that the Momentum of Moving Bodies is to be found by multiplying the Masses into the Volocities) In Answer to such who have sometime ago affirm'd, that that Force is proportionable to the Square of the Velocity, and to those who still defend the same Opinion, in: Phil. Trans. Nr. 375, January and February 1723, pp. 269-279; Desarguiliers, Theophilus Animadversions upon some Experiments relating to the Force of moving Bodies; with two new Experiments on the same Subject, in: Phil Trans. Nr. 376 March and April 1723, pp. 285-290.
- ↑ Wolff, Christian, Principia dynamica, in: CP 1, (1726) 1728, pp. 217-238.
Zurück zur gesamten Korrespondenz