Hermann, Jacob an Scheuchzer, Johann Jakob (1708.10.06)
|
|
| Kurzinformationen zum Brief mehr ... | |
|---|---|
| Autor | Hermann, Jacob, 1678-1733 |
| Empfänger | Scheuchzer, Johann Jakob, 1672-1733 |
| Ort | Padova |
| Datum | 1708.10.06 |
| Briefwechsel | Hermann, Jacob (1678-1733) |
| Signatur | ZB Zürich. SIGN: Ms H 318, pp.363-364 |
| Fussnote | |
Vir Celeberrime Fautor et Amice honoratissime
Ex Parente meo[1] laetus nuperrime intellexi, promissum fasciculum librorum[2] feliciter ad illum pervenisse de quo Tibi obstrictus sum quod ubi ad Te pervenit ulterius ad ipsum curare voluisti; Is mihi simul significarat se literas ad Te esse daturum rogaturus ut si occasionem scires nonnulla in Italiam mittendi, permissionem ipsi concederes alium fasciculum librorum ad Te dirigendi qui postea ulterius has in regiones tuto deferatur quo nomine ut et plures alias ob rationes multum me Tibi debere profiterer uti revera profiteor a Tua me amicitia complura hucusque expertum esse testimonia. A Clariss. nostro Paravicino[3] pariter certior sum factus Te proxime novum tomulum novorum literariorum[4] meditari in publicum edendum; si tempus mihi hac vice suppetiisset aliquid ex chartis meis eruendi, conatus saltem fuissem Basiliensium acta[5] quae ad pauca, certus sum, redigentur utcunque augere; sed forsan proxime dabitur occasio aliquid promendi. Quod ad Clariss. Fratrem[6] attinet ne dubites rogo me omnes nervos intensurum esse quo et ille atque ego voti compotes fiamus, mea enim nimium refert ut ejus necessitudine in hac Universitate Patavina fruar quam ut ejus commoda negligere possim. Sed nulla adhuc occasio se obtulit qua intentum prosequi liceret cum nulla adhuc Cathedra Medica aut Philosophica vacet, sed brevi spero erit quo casu ipsemet ad Excellentissimorum Reformatorum quosdam quos mihi Fautores novi scribam eundemque ita proponam ut de ejus meritis apud Ill.mum Capellum[7] quem eidem favere scio, inquirant hac enim ratione optimum mihi successum polliceor. Sed utinam res ne nihil celerius succederent sed omnia adeo lente procedere solent ut illis qui his in regionibus non degunt vix credibile videri possit. Nuperrime Celeberr. noster Ramazzinus[8] ultra insigne stipendii augmentum ducentorum quinquaginta ducatorum, quod obtinuit Praeses etiam nostri ordinis artistarum est electus ab Amplissimo Reformatorum Magistratu in locum Cel. Abbatis Fardellae[9] qui huic dignitati per septennium praefuit cum secundum leges non nisi per biennium durare debuisset. Inclusas ad Celeberr. Fatium[10] Genevam curandas Tibi vel ideo commendo et obsecro quod aliae quas immediatae ad ipsum dederam aut interciderint an Geonovam[11] primum et abhinc Gen[e]vam fuerint missae. Quod superest rogo ut Clariss. Fratrem Tuum meo nomine salutare velis, Vale mihique favere non desinas Celeberrimi Nominis Tui Cultori perpetuo Hermanno
Patavii die 6.to 8bris 1708.
Fussnoten
Zurück zur gesamten Korrespondenz