Poleni, Giovanni an Bernoulli, Johann I (1731.01.26)
[Noch keine Bilder verfügbar]
| Kurzinformationen zum Brief mehr ... | |
|---|---|
| Autor | Poleni, Giovanni, 1683-1761 |
| Empfänger | Bernoulli, Johann I, 1667-1748 |
| Ort | Padua |
| Datum | 1731.01.26 |
| Briefwechsel | Bernoulli, Johann I (1667-1748) |
| Signatur | Venedig, Biblioteca Marciana. SIGN: ms. It. 284 ( = 6576), Nr.9 |
| Fussnote | |
Joanni Bernoullio
Nescio quonam fato Mercator iste, qui curavit, ut Tibi persolverentur sex illi floreni, non Tibi indicaverit etiam Mercatoris alterius nomen, cui traderes Fasciculum Librorum, huc mittendum cum prima tria Lexici Moreriani Volumina[1] lucem aspicient. Rogavi iccirco iterum vehementerque amicum, ut [cur]et tum certiorem Te fieri de aliquo Mercatore istic, cui Librorum Fasciculus ille sit tradendus; tum etiam Tibi sex alios (quemadmodum debeo) florenos numerari. Pudet (mihi crede) pudet me, quod mea caussa fiat, ut minutis hisce in rebus impendere debeas tempus aliquod, idque detrahere curis litterariae Reipublicae, cui tantum per hercle profuisti, rebusque maioris sane momenti. Sed dabis mihi, ut humanitas tua fert, veniam; et meo huic aliquando importuno ornandae bibliotheculae desiderio liberaliter ignosces. Gratissimae autem mihi erunt Dissertationes, quae Fasciculo eodem continebuntur, nullusque dubito, quin tua illa de Planetarum Orbitis, atque Aphelijs[2] illustre aliquod incrementum sublimiori Geometricae Astronomiae conferatur. At quod attinet ad Libros Petropoli editos, de quibus alias Tibi scripsi, vel pretium Florenorum trigintasex modicum est, et hic profecto multo pluris aestimarentur. Persolvetur a me etiam quae pro portorijs et vectigalibus erit erogata summa; atque praeter id, quod pretij erit, humanitati tuae debebo plurimum. Antequam finio: narrabo Tibi, me nuper alia de caussa evolventem Commentarios Regiae Scientiarum Gallicae Academiae, ad annum 1712 pertinentes, incidisse (pag. 215) in Cl. Bonij Demonstrationes nonnullarum Proprietatum Tractoriae Curvae.[3] Etsi [ve]ro illius Theoremata, et pauciora sunt, quam [ea,] quae ego dedi, et [ordine] alio [concinnent], ut nulla quidem plagij suspicio in me cadere possit; nihilo tamen minus, quoniam scripseram, Proprietatum Tractoriae, me nullas uspiam invenisse Demonstrationes (neque profecto [] [scribebam], inveneram) iccirco, ubi opusculum aliquod edam, laude sua (propter ea quae p[aullo] ante hanc diem mihi innotuere) [] Bonium non fraudabo; notitiamque hanc, quae mihi nova fuit, ego lubens aperiam. Interim me, maximam partem, satisfecisse huic [meo] scrupulo opinor, cum Tibi Viro summo et incomparabili hanc enarraverim. Si Cel. Hermannus in Patriam redeat, daturus is fortasse erit ad me Litteras, ut aveo; multo enim abhinc tempore me ieiunum reliquit. C[ae]terum D. O. M. enixe precor, ut Te Familiamque tuam egregiam sospitet. Si qua in re Tibi, possim inservire, quaero, utaris opera mea? Ut Te maximi facio, ita id Tibi manifestum reddere maxime cupio. Vale.
Patavij. VII. Kal. Febru. MDCCXXXI.
Fussnoten
Zurück zur gesamten Korrespondenz