Bernoulli, Johann I an Mencke, Johann Burckhard (1727.04.04)
|
|
|
|
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Mencke, Johann Burkhard, 1674-1732 |
| Ort | Basel |
| Datum | 1727.04.04 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 674:Bl.176-177 |
| Fussnote | Auf fo. 177r findet sich der Beginn einer weiteren Abschrift dieses Briefes an Mencke, jedoch ohne die Erwähnung Eulers. Dieses Fragment ist durchgestrichen. |
Viro Amplissimo atque Celeberrimo
Joh. Burhardo Menkenio.
S. P. D.
Joh. Bernoulli.
En scriptum aliquod meum Actis vestris, si ita libuerit, inserendum; accedit aliud, sed quod altero post meum mense edi curabis, Auctor ejus est Eulerus noster qui jam in Actis comparuit, Juvenis doctissimus et in sublimiori Geometria versatissimus.[1] Is nunc est in itinere commigrans Petropolim ad occupandam stationem aliquam inter Academicos cum salario annuo 300 Rubelorum, quam obtinuit ex commendatione filii mei Danjelis. Accepi non ita pridem novissimum, quem misisti, Actorum fasciculum continentem menses Julium, Augustum, Septembrem et Octobr. 1726, una cum sectionibus 3 et 4 Supplem. T. IX sed deest nobis adhuc mensis Junius, quem antea non miseras; quare rogo ut eum proxime mittendis in quadruplo adjicias. Adgnatus meus Pharmaceuticae Cultor, qui cum maxime apud vos agit,[2] ante discessum suum persolvet nondum solutorum pretium, aut citius si volueris. Quanti faciam nugas Rizzetti , ex hoc cognosces, quod ejus Schediasmata contra me protrusa[3] ne legere quidem hucusque dignatus sum, aliis negotiis occupatus utilioribus: facile patior ut, qui Hugenium, Leibnitium, Newtonum aliosque magni nominis viros carpere sustinet, me quoque iisdem aggregat; videbo tamen, ubi vacaverit, num conveniat retundere ejus pruritum inclarescendi, enatum ut videtur ex animo infenso Viris de re mathematica bene meritis. Vale et fave.
Dab. Basileae a. d. 4. April. 1727.
Fussnoten
Zurück zur gesamten Korrespondenz