Bernoulli, Johann I an Mencke, Johann Burckhard (1725.03.16)
|
|
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Mencke, Johann Burkhard, 1674-1732 |
| Ort | Basel |
| Datum | 1725.03.16 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 674:Bl.173 |
| Fussnote | |
Viro Amplissimo atque Celeberrimo
Joh. Burchardo Menckenio
S. P. D.
Joh. Bernoully.
Qui has Tibi tradit litteras una cum Schediasmate Actis vestris, si dignum videbitur inserendo Juvenis doctissimus nomine Iselius, nostri Cel. Iselii agnatus, et meus quondam in mathematicis Auditor Tibi Vir Ampl. de meliori nota commendatur, contendit Halam, ubi aliquandiu commoraturus est Studiorum gratia, ac postea iter per Germaniam, Belgium etc. prosequuturus; Si qua in re Tuis consiliis et commendatione eum juvare potes, facies nobis gratissimum; Rogo ut per Mercatores aliave proxima occasione, mittas Actorum Continuationem, et quidem singulorum Exempl. 4; desunt mihi tribusque illis amicis, qui ea expetunt, quicquid sequitur post Junium 1724 et post sectionem septimam Tom. VIII Supplem. Quae debeo illorum nomine (siquidem me liberaliter habeas) post ultimas rationes compensatas initium sumunt a Januario 1723 atque a sectione 3 Suppl. Tom. VIII. Quod si ad accepta addas quae nondum accepimus, nempe 6 menses posteriores anni 1724 et 5 sectiones posteriores Tom. VIII Suppl. efficient singulorum triplum sumendo, menses 72 et sect. 30 h. e. in universum 102 manipulos, qui cum octoni uno constent fl. valebunt fl. 12 et cru[c.] 45; Ex his detrahe 3 fl. 4 b[x]. Cl. Iselio jussu Tuo solutos d. 10. Aug. 1723, restant fl. 9 adhuc solvendi, quam summulam lator harum Tibi numerabit; quo facto incipient novae nostrae rationes, cum initio anni hujus 1725 et Tom. IX Suppl. Quod ut in Rationario Tuo annotes Rogo. Post obitum Russorum Monarchae metuendae sunt turbae in imperio russico, Scientiis ibi nascentibus parum profecturae. Vereor ne Academia Petropolitana in partu suffocetur atque spes omnis cum ipso ejus fundatore jam concidat. Nunc quidem exitus monstrat, quam prudenter Cl. Wolfius declinaverit illecebrosas invitantium pollicitationes. Quod ad reliquos attinet invitatos, inter quos et filius meus existit, id sibi in felicitate reponant, quod mors Imperatoris contigerit ante itineris ingressum; forsan pejus quid experiri debuissent si jam in ipsa statione fuissent Petropoli. Quid vero sit sperandum si nulli motus subsequantur, successionem turbantes, id tempus docebit; de praesenti utique nihil boni hariolor. Quod superest Vale Vir Amplissime et fave.
Dabam Basileae a. d. 16. Martij 1725.
Zurück zur gesamten Korrespondenz