Hermann, Jacob an Bernoulli, Johann I (1708.12.08)

Kurzinformationen zum Brief       mehr ...
Autor	Hermann, Jacob, 1678-1733
Empfänger	Bernoulli, Johann I, 1667-1748
Ort	Padua
Datum	1708.12.08
Briefwechsel	Bernoulli, Johann I (1667-1748)
Signatur	Basel UB, Handschriften. SIGN: L Ia 659, Nr.13*
Fussnote	Siegelspuren. 7 Textzeilen auf Umschlagseite

Viro Subtilissimo et Celeberrimo

Dn. Joanni Bernoulli Phil. et Med. D.

S. P. D.

Jac. Hermannus

Exoptatissimae Tuae litterae, Vir Celeberrime, tanto magis laetitia me affecerunt, quanto majore moestitia Scheuchzerianae adversam Tuam valetudinem nuntiantes antea me impleverant, quod ex Tuis Te convaluisse iterum intelligere potuerim; faxit Deus ut longaeva vita et inconcussa cum salute reconditas scientias et a paucis tactas promovere et illustrare possis. Qualemcunque successum sub auspiciis meae Professionis Parentibus eum tantum in finem identidem significavi ut inde perspicerent me his in oris Italicis haud perditum esse, sed Fautores, Patronos et Amicos habere qui mihi bene cupiant; caeterum pro egregio Tuo voto gratias habeo maximas utpote ex quo constantem Tuam erga me benevolentiam non obscure intellexi, interim tamen cum meo me modulo metiri jam satis didicerim, non parum esse duco quod Excell.^mi Proceres hujus Universitatis conatus meos suo calculo approbarint, sed quod mihi voves ut tandem non ornamentum sed fulcimentum hujus Lycaei evadam nimium mihi videtur cum ne quidem ornamentum esse queam, ad id enim non sufficit diligentia, sed multa alia requiruntur, quibus me destitutum sentio. Nimius praeterea est meus erga antiquam hanc Academiam amor quam ut adeo debile ei apprecari queam fulcimentum quale meum esset si modo fulcimentum dici unquam possem; Tu solus, Vir Inclute Mathematum fundamentum in Academiis nominandus es; talem enim Te censent esse ex tot editis acuminis speciminibus, nostri temporis Geometriae Coriphaei. Talem Te cum beato Fratre sera venerabitur posteritas; ego interim inter gregarios semper collocabor Mathematicos, aliud saltem promittere mihi nequeo si serio me ipsum examinare perrexero. Celeberrimo Gulielmini salutem tuam denuntiavi qui Te vicissim per me salutari cupit. Sine dubio in Manfredii libro elegantiora contineri puto quam in Reynaei opere licet nondum a me viso, cum merito Cl. Manfredius optimus per Italiam habeatur Analysta; quin imo praestantiora eo in opere contineri puto quam in Cheynaei libro ubi semper ad series recurritur quoties differentiale occurrit quod absolute integrabile non est. De Reynaeo miror quod sicco adeo pede veros inventorum Geometricorum Inventores praetereat omniaque ad suum Marchionem Hospitalium derivare satagat cum tamen ipse Reynaeus ea ipsa ut puto Manuscripta a Cl. Stählelio nactus sit quae antehoc Hospitalio impertiveras, sed magis adhuc attonitum me tenet id quod commemoras, nonnullos Paralogismos eum circa Problema Catenariae corruisse cum tamen ex Tuis chartis elegantissimam solutionem expiscari potuerit, sed metuens forte ne de plagio postularetur maluit propriis indulgere cogitationibus quam Tuis. Haec tamen omnia efficiunt ut impatienter Analysim demonstratam expectem. Nisi Scotorum superbiam notam haberem, mirarer Craigii vesaniam quod Tuam solutionem de transformatione curvarum ope motus tractorii sugillare non dubitaverit; cum tamen ipse paralogisticam ejusdem Problematis dederit solutionem, licet plausibilem prima fronte, cujusmodi solutionem et ego inveneram, in qua cum viderem $x$ et $y$ coordinatas transmutandae non nisi unicam dimensionem obtinere in formulis coordinatarum novae curvae, statim suspicabar non novam prodituram esse curvam sed eandem mutata tantum axis positione ad quam applicatae ordinabantur. Quod autem Craigius dicat Curvam ex motu reptorio genitam non semper algebraicam fore licet generatrices tales sint, sine dubio falsum est, supposito has aequales esse et sine examine illud pronunciavit; Quin imo mihi videre videor Curvam genitam ex reptione duarum quarumvis curvarum diversarum sed algebraicarum unius super altera, algebraicam fore; cum in quibusvis algebraicis perpendiculares determinari possint algebraice, aequales amplitudines admittentes; haec autem omnia e vestigio scribo, absque ut ad examinis incudem revocaverim. Non abs re alioquin existinaverim si Craigio paralogismi sui et consequenter etiam ejus umbr[ae] Cheynaeo ostendantur ut tandem modestius, ut decet de se sentire incipiant. Coeterum si Moyvraeus, quem meo nom[i]ne prima occasione, ut salutes, etiam atque etiam rogo, aliquid novi in re mathematica ad Te transmisit obsecro te ejus ut me etiam participem reddere digneris, in ea enim vivo regione ubi non nisi trita et lippis etiam atque tonsoribus nota nunc intelliguntur. Quae de Menckenio filio notas, verissima sunt; ea enim quae in Actis identidem comparent vulgaria adeo sunt et nihil elegantiae habent, ut nauseam aliquando moveant. Ex Dn. Wolfio intellexi Dn. Tschirnhausium haud ita pridem e vivis excessisse et factum esse creditorum concursum quibus solvendo non erat, dolet interea quod secundum et tertium tomum Medicinae Mentis absolvere non potuerit aut potius absolutos typographis committere. In his enim ut dicebat Tschirnhausius multa sunt Geometriae, Physicae, Opticae et Mechanicae arcana qui Wolfio pariter asseverabat veram Methodum curvis adhuc desiderari, et calculum differentialem non nisi aliquod ejus compendium esse, cujus infinita alia dari possint, et similiter adhuc ignorari vera physicae principia et quotquot eam hactenus tractarint a recto tramite aberrasse. Videbimus "Quid dignum tanto feret hic Promissor hiatu", sed vereor ne posterius melius quadret, "parturient Montes, nascetur ridiculus mus". Plura haud fert pagina, iccirco hisce vale et me ama.

Dabam Patavii d. 8.^o Xbris. 1708.

Praestantiss. Varzagliam iterata vice saluto si modo adhuc Basileae commoretur.

A Monsieur

Monsieur Bernoulli des Academies

Royale des Sciences de Paris et de Berlin

et tres Celebre Professeur des Mathematiques

à Bâle

---

Fussnoten

Zurück zur gesamten Korrespondenz (Bernoulli, Johann I)

Zurück zur gesamten Korrespondenz (Hermann, Jacob)