Bernoulli, Johann I an Bilfinger, Georg Bernhard (1723.12.11)
[Noch keine Bilder verfügbar]
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Bilfinger, Georg Bernhard, 1693-1750 |
| Ort | Basel |
| Datum | 1723.12.11 |
| Briefwechsel | Bernoulli, Johann I (1667-1748) |
| Signatur | Stuttgart, WLB |
| Fussnote | 12 Beilagen (s. Brieftext) |
Nobilissimo atque Excellentissimo Viro
Georgio Bernhardo Bulffingero
S. P. D.
Joh. Bernoulli
Hisce significo, Vir Nobilissime, tradidisse me nuper Mercatori cuidam Amico fasciculum ad Te curandum, quem propediem Tubingam perventurum spero, ut ille quidem mihi spem fecit; Reperies in hoc fasciculo sequentia:
1. Commercium epistolicum Collinsii et aliorum.[1]
2. Responsio Leibnitii ad praedictum Commercium d. 29. Julij 1713.
3. Pieces qui ont remporté les deux prix.
4. Extrait du Journal Litteraire 1716, XXII. art. avec les remarques de J. B.
5. Extrait du Recueil de Mr. des Maiseaux avec les remarques de J. B.
6. Taylori Solutio problematis a Leibnitio Anglis propositi.
7. Apologia seu potius Libellus famosus Taylori adversus J. B.
8. Joh. Keillii Epistola invectiva contra Joh. Bernoullium cum Notis Bernoullianis ad marginem scriptis.[2]
9. Addenda at notas Bernoullianas in Epistolam Keillii.
10. Excerpta ex aliis Epistolis.
11. Keillius ἑαυτοντιμωρούμενος, sive Crusii responsio ad Keillii invectivam.
12. Lettre à Mr. s'Gravesande.
Haec sunt quae raptim colligere potui; fortassis quaedam in iis invenies, quae Tibi respondendi materiam subministrabunt si quidem, quod videtur, animus Tibi stat, ad Commercium Collinsianum et ad Desmaisaei Collationem epistolarum aliquam Responsionem parare.[3] Fuissent alia bene multa inter schedas meas dispersa, quae autem conquirere non vacavit. Adjeci Epistolam aliquam meam ad s'Gravensandum, ut videas quantopere Leibnitii partes tuitus fuerim adversus malevolos Anglos, praesertim Clarkium circa veram rationem aestimandi vires Corporum, quod ideo feci quia scio, s'Gravesandum licet Belgam in Anglorum castra transiisse, cum quibus quod ad se scripseram communicare haudquaquam intermiserit.
Tria priora, nempe Commercium Collinsianum, Responsionem Leibnitianam et Scriptum Gallicum Pieces qui ont remporté les deux pris etc. poteris Tibi servare, quia ea in duplo habui, reliqua vero novem, data occasione si ita lubuerit mihi remittes, postquam quae in usum Tuum facere possunt excerpseris. De Controversiis Cl. Wolfii cum Theologis ex ipsiusmet litteris superioribus nundinis Paschalibus ad me datis[4] aliquid intellexi, et quasdam in eam rem schedas volantes legi, ab ipso credo editas;[5] Doleo vires Viri meliore sorte dignissimi, ejusque tempus in vitilitigia collocandum, quod alioquin in excolendam Mathesin et philosophiam tam utiliter collocavit: Similem ego fortunam expertus quondam cum Theologis Batavis Virum optimum solari possum; induat modo constantiam et patientiam, et facile omnes superabit adversitates. Mense praeterito aliquid elaboravi in solutionem quaestionis ab Academicis Parisinis propositae,[6] nunc in eo sum ut dissertationem meam ignota manu describi curem, et postea ad Academiam transmittam visurus quid Galli de ea judicent: Vereris ut Leibnitiana approbentur Parisinis; fortassis justam verendi causam habes, interim hoc non obstante, Doctrinam Leibnitii de aestimatione virium maximae mihi curae fuisse ut assertam darem ex eo colligere poteris, quod potiorem dissertationis meae partem huic unice inaedificaverim. Argumentis utor novis omnino et directe probantibus Corporum vires vivas quadratis velocitatum esse proportionales, argumentis inquam ex intima rei natura petitis, quibus acquiescet spero quisquis non est vaecors aut partibus addictus: Vides me praemio non inhiare, alias me accommodassem Genio Gallorum, Cartesianismo haud dubie prae caeteris faventium; Si nihil aliud lucratus fuero, id mihi satis erit quod veritatem in Germania detectam contra Clarckium aliosque irrisores Anglos in tuto posuero. Quod superest vale Vir Excell. et conatibus meis favere perge.
Dabam Basileae a. d. 11. Xbris 1723.
A Monsieur
Monsieur George Bernhard
Bulffinguer Professeur
extraordinaire en Philosophie
et tres Excellent Mathematicien
à
Tubingue
Fussnoten
Zurück zur gesamten Korrespondenz