Bilfinger, Georg Bernhard an Bernoulli, Johann I (1721.02.26)
|
|
|
|
| Kurzinformationen zum Brief mehr ... | |
|---|---|
| Autor | Bilfinger, Georg Bernhard, 1693-1750 |
| Empfänger | Bernoulli, Johann I, 1667-1748 |
| Ort | Tübingen |
| Datum | 1721.02.26 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 653, Nr.7* |
| Fussnote | |
Vir Magnifice,
et Μαθεματικωτατε.
Repertum esse, qui retundere adversariorum artes, et honorem Tuum argumentis authenticis velit asserere, id quidem non sine voluptate intellexi: Faxo etiam, ut id schediasma quamprimum deferatur Lipsiam, si meae illud fidei velis committere. Non dubito, quin boni omnes probaturi sint id consilii, quod alieno mage, quam Tuo, calamo importunas sollicitationes elidere constitueris: Mihi, si quid judico, ita videtur sartam esse tectamque existimationem Tuam, quamdiu adversarii Tui non possint illam ex Actis Lipsiensibus declarationem expungere, quam provocationi Keillianae opposuisti, neque tamen in rem presentem venire ausint: Aliud Tuis meritis dignius medium, idemque efficacius, excogitari, puto, non potuit. In nupera vitae Tuae recensione germanica nonnulla aliter inflectenda rati sunt Amici mei, pro suo instituto, quod salvis omnibus, quae ad rem ipsam pertinent, se praestituros esse per Litteras mihi promiserunt: Te non invito id fieri posse, ex Litteris ad me datis intellexerunt, alioquin verba magis illius scripti, quam consuetudinem suam, secuturi. Tabulae aeneae ectypos jam divulgatos esse, dubium non est: quandoquidem vero prototypum Bibliopola servare solet, monebo proxime, ut, si qua fieri amplius correctio possit, illa tentetur. Commercium epistolicum,[1] quod memoras, ad nos nondum pervenit: illud vix ambigo, quin Tibi notissimum sit, in editione nupera Germanica epistolarum Leibnitii atque Clarkii accessisse responsionem ad quintam Clarckii epistolam,[2] quae Thümmigii, Auditoris Wolfiani, nomen praefert. Utinam Leibnitiana venissent in alias manus, ut epistolis selectae possent epistolae opponi. Verum illa si interclusa est via, unum hoc ex Te, Vir Magnifice, liceat efflagitare publici boni caussa, ut quem hucusque admirati sumus obtrectationes refellendi modum, eum nobis in posterum ne invideas: hoc dico, ut ne graveris, porro inventis Tuis obruere invidos, et, quod a Te uno expectamus, artem perficere. Ita Vale pro incrementis scientiarum, atque amplius Benevolentia Tua, ita precor, complectere Bernoulliani Nominis Cultorem deditissimum M. Georg Bernh. Bülffingerum.
Tubing. 26. febr. MDCCXXI.
Fussnoten
Zurück zur gesamten Korrespondenz