Bernoulli, Johann I an Bilfinger, Georg Bernhard (1720.05.29)
[Noch keine Bilder verfügbar]
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Bilfinger, Georg Bernhard, 1693-1750 |
| Ort | Basel |
| Datum | 1720.05.29 |
| Briefwechsel | Bernoulli, Johann I (1667-1748) |
| Signatur | Stuttgart, WLB |
| Fussnote | In der Abschrift zweites eigenhändiges P.S. von Joh. I B. |
Viro Clarissimo atque Doctissimo
M. Georgio Bernhardo Bulffingero
S. P. D.
Joh. Bernoulli
Acceperis, ut spero, litteras meas postremas cum adjunctis schediasmatis.[1] En Tibi nunc Iconem mei ante aliquot dies ad me missam speciminis loco ut eam ubi a Chalcographo erratum fuerit corrigi facerem: Reapse Pictor eam correxit et quantum licuit accurate ad similitudinem reduxit; cave quaeso ne attrectando digitis deleas vel confundas cerrussam et cretam nigram locis corrigendis superinductam, quam cautelam commendabis quoque Halensibus ad quos imaginem missurus es. Mitto insuper aliquam vitae meae descriptionem a quodam Discipulo meo compositam, optassem accuratiorem, multa quippe notabiliora omisit, alia inseruit quae omissa cuperem, sed relinquo Editoribus omnia suo arbitrio mutanda, castiganda, augenda, demenda. Iam si ita placuerit transmittes Halam quantocyus hoc scriptum cum ipsa imagine, quam Caelator in tabula sua aenea studiose imitetur et partes a Pictore correctas etiam ipse emendet, vellem si tempus concederet ut altera vice specimen aliquod post correctionem mihi transmitteretur antequam exemplaria excudantur. Cum ipsa imagine ad corrigendum missa accepi etiam litteras officiosissimas et humanitate plenas, sed certe nescio unde et a quo mihi venerint, erant enim exaratae, ut ajunt, sine die et Consule, loco quoque scriptionis omisso, nisi quod ex contento litterarum conjectem eas Hala Magdeburgica dimissas esse: nomen scriptoris nonnisi hoc signo [Figur][2] exprimente ni fallor quatuor has litteras M. J. W. G. erat signatum, itaque Scriptori mihi etiamnum ignoto respondere non possum, quare Te Vir Clariss. rogatum cupio ut illi, Tuo certe ceu apparet ex litteris amico singulari, meo nomine gratias agas pro eo quo in me affectus est animo summe benevolo. Caeterum excusatum me habeas quod schedas hasce ad Te dirigam, quas alioquin immediate Halam misissem ad Rengerum Bibliopolam uti jussus fui, si nempe mihi innotuisset nomen Viri illius sub charactere modo memorato delitescentis, cui responsoriae meae fuissent inscribendae. Vale Vir Clarissime et me quod facis ama.
Dabam Basileae a. d. XXIX Maj. 1720.
P. S. Si quid et Tu in mei Biographia mutandum deprehendas vel etiam novi quid adjicere velis, id Tibi per me licebit.
2. P. S. Hoc ipso momento absoluta jam scriptione me convenit Biographus meus, sibi non sat temporis fuisse significans ob negotia quaedam ad perficiendam descriptionem, petitque ut per aliquot dies ablegationem differam. Interim quia Halenses instanter desiderant citissimam typi correcti remissionem, eum tamen hoc die Tibi mitto, missurus proximo cursore ipsam vitae meae Historiolam.
Fussnoten
Zurück zur gesamten Korrespondenz