Hermann, Jacob an Bernoulli, Johann I (1708.04.21)
|
|
| Kurzinformationen zum Brief mehr ... | |
|---|---|
| Autor | Hermann, Jacob, 1678-1733 |
| Empfänger | Bernoulli, Johann I, 1667-1748 |
| Ort | Padua |
| Datum | 1708.04.21 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 659, Nr.11* |
| Fussnote | Siegelspuren |
Ingeniosissimo et Celeberrimo Viro Joh. Bernoulli, Ph. et Med. D. et Math. P. P.
Jacobus Hermannus S. P. D.
Dum gratia Tua me excidisse inde suspicabar et dolebam, Vir Clarissime, quod nulla adhuc a Te epistola exhilaratus fuerim, ecce Leibnitianae et Varignoneanae literae prostratam mihi spem iterum erexerunt de perenni Tua erga me benevolentia in tantum me certiores reddentes quod ad eximios hos meos Fautores ita Te de me scripsisse viderem ut non nisi ex animo Tuo erga me benevolo et amoris pleno talia proficisci potuissent. Et Paternae tandem literae mihi nuntiantes, Tuam revera epistolam ad me fuisse dimissam, integrae iterum serenitati et tranquillitati restituerunt animum, quanquam deplorandum mihi acciderit accidens tuas literas aliasque Ampl. nostri Consulis Socini Tabellariorum negligentia hucusque deperditas, neutiquam ad me pervenisse.
De spectatiss. Parentis Tui obitu Tecum V. C. doleo Deumque precor ut alia omnis generis adversa a Te totaque honoratissima Domo abesse velit et jubeat. Ab altera vero parte Tecum iterum laetor Tibique ex toto pectore gratulor de Filii Tui natu majoris ad publicas lectiones promotione et applausu quam oratione in summo templo recitata feliciter recitata nactus est,[1] faxit Deus ut optimo cum fructu et successu studiis suis operam det et ut verbo omnia complectar, Parentis vestigia gnaviter premat ejusque ad instar summae eruditionis laudem tandem adipiscatur.
Ante sex circiter dies Marchionis Hospitalii Opus postumum[2] cum Commentariis Academiae Parisiensis 1706 accepi, in priore opere video Auctorem multum esse in Inscribendis Polygonis Circulo et arcubus circularibus in data ratione secandis quae omnia cum multis aliis a Te provenire suspicor[3]. In Commentariis Academiae Exceptis Tuo Schediasmate[4], Dn. Varignoni et dela Hire tenuia mihi videntur quae reliqui ibi protulerunt; Hirii autem tractatum ibi extantem de Lineis Cycloidalibus[5] nondum legere vacavit. Quid mali fecit Fatio in Anglia quod tam male habitus fuerit? Manfredii tractatum ut quam citissime fieri possit accipias curabo. Hisce vale et me ama. Gravissimo Dn. Scholarchae Socero Tuo cultum quaeso meum defer, ut etiam lectissmae thori Sociae. Cel. Fardella plurimum Te saluere jubet.
Patavii die 21 Apr. 1708.
A Monsieur
Monsieur Bernoulli tres Celebre Pro-
fesseur des Mathematiques
à Bâle
Fussnoten
Zurück zur gesamten Korrespondenz (Bernoulli, Johann I)
Zurück zur gesamten Korrespondenz (Hermann, Jacob)