Bernoulli, Johann I an Poleni, Giovanni (1726.01.23)
[Noch keine Bilder verfügbar]
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Poleni, Giovanni, 1683-1761 |
| Ort | Basel |
| Datum | 1726.01.23 |
| Briefwechsel | Bernoulli, Johann I (1667-1748) |
| Signatur | BS UB, Handschriften. SIGN: L I a 675, fol.21r-22v |
| Fussnote | |
Celeberrimo Eximioque Viro
Joanni Poleno
S. P. D.
Joannes Bernoully.
Quas ad Danielem filium meum exaraveras litteras, pridie Kal. Octob. Anni superioris datas, alterasque Tuas ad me scriptas VII Kal. decemb. in uno Jnvolucro nuperrime demum accepi una cum fasciculo elegantissimi Tui opusculi.[1] Exemplar ejus Nic. agnato meo destinatum, eidem protinus reddidi, Alterum data Occasione ad Danielem mittam, Petropoli cum maxime degentem; Tertium mihi datum servabo. Fasciculum alterum priori inclusum missurus sum, quamprimum invenero mittendi occasionem, Lugdunum Batavorum ad Petrum van der Aa, Bibliopolam ejus Urbis haud incelebrem, ut Tuo Vir Inclyte satisfiat Desiderio. Tempore proxime futuri Paschatis, si alia interea citior commodiorque se non obtulerit, certo dabitur occasio, quo quippe tempore Mercatores Nostrates ad Nundinas francofurtanas proficiscuntur, aliique complures ex Batavis, quorum aliquis fasciculum sibi tradendum deferet Lugdunum; Gratias vero ago Vir Cel. et meo et Agnati filiique nomine, pro insigni quo nos singulos mactasti munere; Legi sane ac perlegi non sine delectamento ambas Tuas Dissertationes, alteram de Forma Telluris, alteram de motu musculorum;[2] placent quae commentus es ad demonstrandum illam posse sphaericam esse; licet admittatur Vis centrifuga sub parallelis Aequatori oriunda a circumgyratione Terrae et aliquid destruens de corporum gravitate? Dedit Cl. de Mairan in Comment. Paris. ad Ann. 1720 simile quoddam specimen,[3] quo probare nititur formam Terrae non obstante vi centrifuga illa adipisci potuisse figuram non modo sphaericam sed omnino sphaeroidicam oblongam, innuens vim istam nil aliud efficere quam ut sphaerois minus sit oblonga, quam esset si nulla foret vis centrifuga, h.e., si Terra quiesceret, cujus figuram primitus oblongam provenire potuisse asserit ab inaequali pressione vorticum coelestium, terrenum Vorticem circumstantium; Tu vero Vir Doctiss. eundem effectum derivas ab inaequali densitate materiae Tellurem componentis, utra opinio sit probabilior, ego quidem nolo decidere, aliae ni fallor confingi possent conjecturae idem probantes quod uterque vestrum intenditis; mirificam mihi crearunt Voluptatem Experimenta ingeniosa et admodum a Te instituta ad confirmandum systema meum de motu musculari, ubi eleganter ostendisti Experientiam suffragari rationibus a me datis atque calculis subductis;[4] nihil certe aptius eam in rem excogitari potuisset; filii mei feliciter emenso itinere longo Petropolin venerunt salvi et sospites, benigne ab Omnibus excepti, sicuti testati sunt in duabus, quas jam ab ipsis accepi Epistolis, asserentes omnia se meliora invenisse quam sperabant, atque imprimis laudantes Clementiam Imperatricis erga Academicos Advenas.[5] Quod superest Vale atque mihi favere perge.
Dabam Basileae a. d. X Kal. Febr. MDCCXXVI.
Fussnoten
Zurück zur gesamten Korrespondenz