Scheuchzer, Johannes an Bernoulli, Johann I (1716.01.12)
|
|
| Kurzinformationen zum Brief mehr ... | |
|---|---|
| Autor | Scheuchzer, Johannes, 1684-1738 |
| Empfänger | Bernoulli, Johann I, 1667-1748 |
| Ort | Zürich |
| Datum | 1716.01.12 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 668, Nr. 80* |
| Fussnote | |
Viro Excellentissimo, Fautori Honoratissimo
D.o Iohanni Bernoullio
S. P. D.
Johannes Scheuchzerus.
Nescio quaenam vel fortuna vel invidia fata mea rotet, tam praeposteris successibus, meae penitus evertuntur spes: Octiduum est et quod excurrit, quo petitio Ill[ust]ris, Serenissimae Reip. Venetae Legati, ab Ampliss.o Magistratu nostro penitus elusa est et in spongiam incubuit; Si unquam annuere voluisset magistratus noster indubie in Legione cohortem obtinuissem, sed nunc semel pro semper, ut videtur, omnis pro Tigurinis occasio pro confoederatis Venetis militandi praecisa est: doleo sane et mei et filij gratia, perdidi etenim et fortunae ridentes aspectus, et occasionem filio Tuo[1] perquam mihi charo, et consuetudinem et affectum ex animo testandi. Nolim tamen ut hanc ob rem consilium mutes eundem Venetias mittendi, dabitur forsan occasio ut eum alijs mihi amicis commendem; Scias etenim negotium conducendae in Dalmatiam Legionis jam cum Rhaetis inceptum, quo casu D. De Salis, antehac Legatus in Belgio, Vir civilissimus juxta et humanissimus, Matheseosque divinae magnus aestumator, ut credo Legionis praefecturam in se suscipiet, cumque ejus multoties favorem expertus sim, et gloriari de ejus amicitia possim, filium Tuum Viro dignissimo ita commendabo, ut certus esse possis, eum aeque cum illo ac mecum Venetias Sartum tectumque conductum iri. Quoad ea quae secum sumere necessum habet, brevibus mentem meam, ea quam dedisti, libertate et pro Sinceritate mea aperiam: Curta supellectilis res optima pro suscipiendis itineribus est, imo rem in compendio habere conducit, nihil mecum ipse portarem quam quod exquisitum, praecipue autem indusia ex linteo pulchriori, imo Hollandico ut ita dicunt, confecta, sicuti et reliqua linteamina, quae exquisita esse debent, hodierni etenim vestitus praecipuus splendor in hoc ipso, ut nosti versatur; Vestimentum integrum Basileae perfici curarem ego, cum Venetijs pannus Belgicus, res sit prohibita, et consequenter tanto etiam carior. Quoad supellectilem librariam, eam non numerosam consulo, optimum est quod eam filius secum portet quorsumcunque, sine tamen volumine magno, ut et dispendio, necessaria ipsi hinc erunt parvi momenti. En ea quae sentio, quae si cum mente Tua convenerint, gaudeo, Si non libertatem quam jussus sumsi boni quaeso consule, et corrige. Caeterum Salutes quaeso officiosissime Lectiss.am Thori sociam cum integra familia, mea etiam dicas officia Agnato. Quibus Vale et mihi favere porro ne dedigneris.
Dabam Tiguri a. d. 12. Ian. 1716.
Fussnoten
- ↑ Nicolaus II Bernoulli (1695-1726).
Zurück zur gesamten Korrespondenz