Bilfinger, Georg Bernhard an Bernoulli, Johann I (1724.07.26)
|
|
| Kurzinformationen zum Brief mehr ... | |
|---|---|
| Autor | Bilfinger, Georg Bernhard, 1693-1750 |
| Empfänger | Bernoulli, Johann I, 1667-1748 |
| Ort | [s.l.] |
| Datum | 1724.07.26 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 653, Nr.17* |
| Fussnote | Siegel |
Magnifico Viro,
Domino Joanni Bernoullio,
Sal. et off.
Georgius Bernhardus Bulffinger.
Urget me hora, qua dimittendae sunt litterae: igitur, quae ad humanissimas Tuas debeo responsa, liceat in proximas differre. Wolfianam epistolam[1] nolui ad Te dimittere, nisi cum gratiarum actione multiplici, pro eo favore, quem demonstrasti prolixa fati dissertationis Tuae enarratione,[2] maxime, quod, ubi primum licuerit animum ad istas curas transferre, ipsius quoque communicationem faventissimam abs Te expectare liceat. Faxo, ut non diu absit domo, si rogatus eam transmittere dignatus fueris: rogabo autem id beneficii, cum a quotidianis otium fuerit. Confido plana abs Te reddita esse, quaecunque hic dubia occurrunt aut difficilia. Neque moror, quod Galli nondum plene assentiantur. Oportet validas esse rationes, quibus praejudicium inveteratum eousque subruisti, ut incipiant veritati cedere, qui renitebantur. Commentariorum Trivultinorum copia mihi in praesens non est; curabo, ut describantur, quae ad Te pertinent. Argumentum ut memoria succurrit, hoc est: Si Cyclois est Curvarum omnium brachystochrona: est isoperimetricarum quoque; contradictionem igitur solutiones involvunt, si olim Cyclois prodiit generaliter, et specialiter nunc alia. Miror, non attendisse Virum, quod ea curvae longitudo dari possit, quae Cycloidi (brachystochronae omnium indefinite Curvarum) non conveniat, sed eandem aut excedat aut ab eadem deficiat.
Wolfiana, credo, Te ab ipso intelligere. Urgetur undique scriptiunculis adversariorum. Quales illi Heroes sint, ex eo colliges, quod novissime successor Wolfii Langius defenderit, horologia non agitari a motore externo, sed interno. etc. Vale, Vir Maxime, atque inter Cultores Tuos etiam mihi fave.
26. Jul. 1724.
A Monsieur,
Monsieur, Jean Ber-
noulli, tres Excellent Mathematicien,
Professeur Ordinaire, et Membre des
Societés Royales de Paris, Londres,
et Berlin etc.
à
Bâle.
Fussnoten
Zurück zur gesamten Korrespondenz