Bernoulli, Johann I an Mencke, Johann Burckhard (1720.03.27)
[Noch keine Bilder verfügbar]
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Mencke, Johann Burckhard, 1674-1732 |
| Ort | Basel |
| Datum | 1720.03.27 |
| Briefwechsel | Bernoulli, Johann I (1667-1748) |
| Signatur | BS UB, Handschriften. SIGN: L I a 674, fol.158 |
| Fussnote | Schlussformel, Datum und P.S. eigenhändig |
Viro Amplissimo atque Celeberrimo
Joh. Burchardo Menkenio
S. P. D.
Joh. Bernoulli.
En Tibi, Vir Amplissime, duo a Filio meo parata schediasmata; unum quod famosam quaestionem de Trajectoriis inde a Leibnitii temporibus inter Anglos et Germanos nostros vehementi contentione agitatam ita penitus discutit atque solvit, ut vix quicquam amplius solutionibus nostris superaddi posse videatur, alterum, quod continet analysin alicujus problematis Geometrici a Celeb. Hermanno in Actis Vestris propositi:[1] Si ambo haec scripta in iisdem Actis locum mereri judicaveris, rogo ut quantocyus edantur, ne rei novitas obsolescat, cum praesertim jam ante 6 vel 7 menses parata occasionem mittendi expectaverint. Prius illud de Trajectoriis tripartitum est in 3 sectiones, ut partitis vicibus in lucem prodeat, si id una vice commode fieri nequeat.
Accepimus Acta usque ad Octobr. 1719 inclusive et ad 5tam Sectionem Supplem. Tomi VII sed pretium eorum a Majo 1717 et a secunda sectione Supplem. Tom. VII nisi fallor, nondum est persolutum; persolvet autem Amicus, qui hunc fasciculum Tibi tradit, hunc in finem des, quaeso, ipsi debiti notulam, quam mihi monstrare possit, ut solutum restituam. Actis proxime mihi mittendis adjice, si placet, in duplo Tabulam II pro anno 1718, utpote, quae in utroque exemplari deest. Desiderat aliquis Amicus Acta vestra, quaecunque ab initio Anni 1718 hucusque prodierunt et posthac prodibunt, quare rogamus ut inposterum omnia in triplo mittas, pretium una cum altero accurate solvetur.
Vale Vir Ampl. et me quod soles ama.
Dabam Basileae a. d. XXVII. Martij MDCCXX
P. S. Mitto quoque tertium schediasma in Actis edendum quod Agnatus meus, qui nuper ex Italia rediit, responsionis loco opponit cuidam Italo nomine Fagnano, cujus scriptum in Diario Veneto extat.
Rogamus ut typi sollicite corrigantur per Correctorem peritum atque ut inprimis evitentur errores in signis et characteribus analyticis vel ad figuras pertinentibus.
Fussnoten
Zurück zur gesamten Korrespondenz