Bernoulli, Johann I an Mencke, Johann Burckhard (1716.04.08)
[Noch keine Bilder verfügbar]
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Mencke, Johann Burckhard, 1674-1732 |
| Ort | Basel |
| Datum | 1716.04.08 |
| Briefwechsel | Bernoulli, Johann I (1667-1748) |
| Signatur | BS UB, Handschriften. SIGN: L I a 674, fol.152-153 |
| Fussnote | P.S. eigenhändig. Dem Brief ist ein Zettel (fo.153; 7,5 x 11.5, eigenhändig) mit der Liste derjenigen Errata beigebunden, die Johann Bernoulli im vorliegenden Brieftext Mencke mitteilt. |
Viro Amplissimo et Excellentissimo
J. Burchardo Menkenio
S. P. D.
Johannes Bernoulli
Permitte Vir Excell. ut ad Te mittam Epistolam hanc ad Celeb. Wolfium curandam: continet illa varia ad rem Mathematicam spectantia, quaeque ut spero Actis vestris inserenda communicabit.[1] Inservient nonnulla vindicandis quibusdam inventis Germanico nomini contra obtrectationes aemulorum aliquorum trans mare habitantium. Quae superiori anno misisti Acta, usque ad Majum inclus. 1715 et ex Supplem. usque ad sectionem III inclus. Tomi VI pertingunt: quare rogamus ut sequentia quae hactenus prodierunt in duplo mittere pergas, ad exemplaria nostra complenda vel continuanda, illud nempe quod mihi est et alterum quod bibliotheca nostra publica possidet. Mercator iste qui hanc Tibi tradit, in commissis habet ut parato aere persolvat, pretium quod petieris.
Accepi nuper munere scriptoris partem alteram Operis Wolfiani elegantissimi quale nunquam vidi in hoc genere.[2] Promittit Auctor Lexicon Mathematicum, non dubito quin solita Auctoris dexteritate et exactitudine sit proditurum.[3] Libellum Tuum de Charlataneria Eruditorum[4] magna cum voluptate nec sine risu intermixto perlegi: gratias pro eo refero quas possum maximas, amici quibus legendum commodavi omnes mirificum delectamentum hauserunt ex lectione libelli aurei, quem ob puritatem sermonis et festivitatem materiae impense laudarunt. Aliquis ex Amicis meis legendum nuper mihi communicavit Actor. Junium anni superioris ubi extat specimen meum de Turbinationibus[5] (sed figurae deerant); inveni errata typographica sequentia quae moneri possunt in Actis. P. 243, l. 7 post "exemplum" insere "extat". P. 244, l. 19 lege "quatuorve". P. 249, lin. 13. lege "conicae". P. 253, l. 5 a fine pro "" leg. "". Pag. 254, l. 23 post litteram dele comma, tribusque litteris superinducatur linea. Ibid. lin. 26 post "turbinationibus" insere "systematis". P. 257, l. 10 leg. "solidorum".
Cl. Hermannus noster aliquid ad Acta vestra communicabit quod a me habet, nisi forsan, quod credo, jam miserit.[6]
Post mortem Regis Gall. quaedam mutationes in Academia scient. Paris. peractae sunt; hac de re sequentia ad me nuper Parisiis perscribuntur. "La place etc."[7]
Haec sunt quae Te scire volui, quod superest Vale Vir Amplissime ac mihi fave.
Dabam Basileae a. d. 8. Aprilis 1716.
P. S. Observavi nuper in meo Actorum exemplari duarum Tabularum defectum, nempe in Anno 1704 deficit Tab. II. Et in Supplem. Tomo V deest Tab. IV.
Quem duplicem defectum si sine incommoditate Tua restituere posses, foret mihi gratissimum.
Fussnoten
Zurück zur gesamten Korrespondenz