Bernoulli, Johann I an Hermann, Jacob (1712.03.27)
[Noch keine Bilder verfügbar]
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Hermann, Jacob, 1678-1733 |
| Ort | Basel |
| Datum | 1712.03.27 |
| Briefwechsel | Bernoulli, Johann I (1667-1748) |
| Signatur | BS UB, Handschriften. SIGN: L I a 659, Nr.13 |
| Fussnote | |
Viro Celeberrimo et Excellentiss.
Jacobo Hermanno
S. P. D.
Joh. Bernoulli
Ecce apographum vocationis Regiae quod hodie mane post concionem ambulanti mihi cum Celeberr. Iselio nostro in area Petrina[1] tradidit tabellarius litteris Cl. Wolfii inclusum, qui me rogavit ut Tibi quantocyus transmitterem, veritus ne autographum ipsum quod Tibi per aliam viam misit forte interciderit: quanta laetitia fuerimus perfusi Cl. Iselius et ego inopino hoc nuncio vix exprimere possum. Statim a prandio me contuli ad Rev. Tuum Patrem, qui eodem momento litteras a Te accepit, quibus insinuas Te litteras vocatorias exspectare intra duos menses; gratissimum itaque Tibi fore non dubito, ubi videris Te voti compotem factum ante terminum speratum. Rev. Parens summo pariter gaudio nuncium a me accepit.
Urget Cl. Wolfius ut discessum matures; constituas itaque res Tuas, ut Te hic brevi simus visuri; gratulationem differo in adventum Tuum, interim ut iter aggredi et ex animi sententia absolvere possis ardentissime voveo; non necesse puto Tibi memoriam refricari de Adgnato meo commendando vestris Proceribus, quoniam id Te facturum pro certo habeo; qua vero ratione id efficacissime fieri possit, prudentiae Tuae relinquo. Caeterum me refero ad litteras meas ante aliquot hebdomadas ad Te datas: nunc tempus est ut cubitum eam, vergit enim ad mediam noctem. Vale et fave.
Dabam Basileae ipso festo Paschatos 1712.
P. S. Rescripsi hodie Cl. Wolfio quod suo desiderio eodem hoc die ut vides sim satisfacturus.[2]
Fussnoten
Zurück zur gesamten Korrespondenz (Hermann, Jacob)
Zurück zur gesamten Korrespondenz (Bernoulli, Johann I)