Bernoulli, Johann I an Bilfinger, Georg Bernhard (1725.02.28)
|
|
|
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Bilfinger, Georg Bernhard, 1693-1750 |
| Ort | Basel |
| Datum | 1725.02.28 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 653, Nr.21 |
| Fussnote | |
Viro Celeberrimo
Georgio Bernhardo Bulfingero
S. P. D.
Joh. Bernoulli
Cur non statim responderim ad novissimas Tuas undecimo hujus mensis datas,[1] ratio est quia quotidie expectabam litteras a filio meo in Italia degente, ex quibus aliquid de ejus valetudine Tibi perscribere possem, tandem accepi ab ipsomet scriptas, quibus significat se quidem a febre liberatum sed vires non nisi lentissime redire, qua de causa Medici suadeant, ne se committat itineri in Patriam ante Mensem Majum. De Negotio Petropolitano scripsit hanc quam vides epistolam ad Ill. Com. de Galowki,[2] reliqui eam apertam ut legere queas et mentem filii mei percipere; rogo ut perlectam quantocius Cl. Wolfio cum adjuncta mea transmittas,[3] illamque ne obseres, ut et ipsi pateat sententia filii. Videbis parum spei affulgere ut hoc anno iter aggredi possit in Russiam: sed dubito an Ill. Comes petitam dilationem indulgere voluerit; si quid eam in rem tua intercessione contribuere possis, foret nobis gratissimum; Intellexi a Cl. Goldbachio, qui Berolini agit, destinatam quidem fuisse invitationem filio meo natu majori Juris apud Bernenses Professori,[4] integrum vero nunc relinqui uter eam acceptet, an major an minor: Optarent nunc fratres, ut ambo admitterentur, quam gratiam si obtinere possent, foret id quod eundi animum adderet, nunc quidem adhuc (si alteruter solus poscatur) hesitantibus; Usque adeo enim se mutuo amant hi duo fratres, ut tam longo intervallo aegerrime se dirimi paterentur. Accedo Vir Amicissime Tuis Rationibus, ob quas Tibi persuasum est, servatum iri in Russia quaecunque promittantur: Unum tantum est, ad quod respondere oblitus es, quid nimirum sperandum an metuendum esset, si Russorum Imperator mortem oppeteret, quaeritur namque quis sit futurus successor, cujus sit indolis, an perinde sit Fautor studiorum, ac est qui hodie regnat annon turbae sint metuendae, atque mutationes litteris litteratisque funestae; sunt sane qui infausta ominari volunt; sed spero meliora; Dominus enim providebit. Si quidem perstas in eo, quod constituisti obtemperare vocantibus, nihil est, quod addam, nisi votum fervidissimum, ut Te Deus salvum et sospitem Petropolin ducat, ibidemque omnia Tibi ex animi sententia eveniant: Instat ut video discessus Tuus, quare Te rogatum volo, ut ne obliviscaris remittere mihi Schedas et documenta illa ad controversiam cum Anglis spectantia, ante complures menses ad Te missa, retinebis ea quae in duplo habui et quibus me carere posse indicavi. Vale Vir Optime et porro mihi Fave.
Dabam Basil. a. d. 28. februarii 1725
Fussnoten
Zurück zur gesamten Korrespondenz